कतेक रास बात

बूढ़’क अर्थशास्त्र’क भाग-२ (श्रद्धान्जली ओसामा बिन लादेन केँ)

2011-08-12T14:19:00.007+05:30

लेखक-खट्टर काका

मोबाइल आ इन्टरनेट ई दुनियाँ मे जे परिवर्तन आनने हो से दोसर गप्प, मुदा हम दाबी सँ कहि सकैत छी जे हमर घर मे क्रान्ति जरूर आएल अछि. आब अहाँ लोकनिक काकी’क चुल्हा-चिनवार बिल्कूल “ग्लोबल” भ’ गेल अछि. ओ पूरे दुनियाँ’क सम्पर्क मे रहैत छथि आ नहि जानि केहेन केहेन प्रश्न पुछैत रहैत छथि. पहिने तऽ बात केवल केवल प्रश्ने टा तक सीमित छल मुदा आब बात ओहि सँ आगू निकलि गेल. पुरे दुनियाँ के छकाबे वाला अहाँक खट्टर काका आब काकी सँ हारि मानैत छथि. आब हम बुझए लागलहुँ जे भाँग हम खाइत छी आ ओ किएक बोतलाएल रहैत छथि?
आई भोरे भोर चाह पीबाक काल काल मे हमरा पुछए लागलीह, “अहाँ ओसामा बिन लादेन’क बारे मे की जानैत छी?”
हम कहलिअन्हि, “ओसामा के बारे मे कोनो बात आब नुकाएल अछि की?”
हुनकर जवाब छलन्हि, “ओ अरब जगत के दोसर खट्टर काका छलैथ।”
हमरा नहि बुझल छल जे हमर प्रतिद्वन्द्वी अफगानिस्तान के कबायली इलाका मे रहैत अछि. खट्टर काका आ ओसामा बिन लादेन मे समानता ताकब सबहक मजाल नहि. मुदा जखन कल्पना अपन चरम सीमा केँ पार कऽ जैत छैक तऽ ओहि ठाम सँ कल्पना कयनिहार’क बतहपन शुरु होइत छैक. अहाँक काकी’क हऽद जानबाक लेल हम हुनका खोदनाय शुरु केलहुँ.

बूढ़’क अर्थशास्त्र’क पछुलका अँक मे पढ़लहुँ जे दू टा सरदार (मनमोहन सिँह आ अहुलवालिया) मिलि अर्थशास्त्र मे घोर गलती केने जा रहल छथि. बढैत जनसँख्या, अन्ग्रेजी बाजबाक योग्यता आ कम्प्युटर’क सामान्य जानकारी पर भारत केँ सुपर पावर बनेबाक योजना बना रहल अछि. मुदा ई दुनू टा सरदार बिसरि गेल छथि जे एखुनका ६५% यूवा जनसँख्या तीस साल बाद बुढ़ा जायत. तखन नहि तऽ आर्थिक प्रगतिए रहत आ नहि सुपर पावर बनबाक कोनो लालसा. चारु दिस बुढे-बुढ आ बुढ़ सँ जुड़ल अर्थशास्त्र.

हम हुनकर पहिल प्रश्न’क जवाब दैत कहलिअन्हि, “ओसामा बिन लादेन मात्र एकटा आतँकवादी छल आ हुनकर गति ओहने भेलनि जेना कोनो सामान्य आतँकवादी’क होएत छन्हि. आतँक’क एतेक बड़का साम्राज्य कोनो काज नहि एलनि. अमेरिका हुनकर घर मे जा केँ मारि देलकनि आ किनको कानो कान खबरो नहि भेलनि”।

“तऽ अहुँ वैह बुझैत छी जे बाँकी दुनियाँ बुझैत छैक”, अहाँ लोकनिक काकी अपन इन्टरनेट सँ ताकल जानकारी पर कनफ़िडेन्ट छलीह आ हम ई पहिने भाँपि गेल छलहुँ।
तेँ हुनकर जानकारी केँ हम चुनौती दैत कहलिअन्हि, “इन्टरनेट सँ ताकल जानकारी ओतेक विश्वसनीय नहि होएत छैक. पूरे दुनियाँ के बुझल अछि जे ओसामा की छल।”

“हम कहलहुँ ने, ओसामा अरब जगत के दोसर खट्टर काका छलाह” ओ फेर सँ वैह दोहराबैत कहलीह.
हम कहलिअन्हि, “ हँ हमरा बुझल अछि ओ हमरे सन हेहर छथि, वैह जिद्द, वैह arrogance, ओतबी बहस कयनिहार, मुदा एहि सँ किओ खट्टर काका नहि बनि जैत छैक”।
“ओसामा एकटा कोर्पोरेट जगत के सी.ई.ओ छलाह” सोझे सोझ अपन मुद्दा पर आबैत अहाँ’क काकी हमरा कहलैथ.
“कोन कार्पोरेशन के ओ सी.ई.ओ छल यै” हम पुछलिअनि।
“आतँकवाद अपने आप मे एकटा कार्पोरेशन छैक. एतय वैह नियम सब लागू होएत छैक जे दोसर बहुराष्ट्रीय कम्पनी मे लागू होएत छैक. कोनो भी बहुराष्ट्रीय कम्पनी सन दुनियाँ के प्रत्येक कोन मे आतँकवाद’क आफ़िस होएत छैक. ओहिना रीक्रुटमेन्ट होएत छैक. नफ़ा-नुकसान ओहिना होएत छैक. कम्पनी’क क्वाटरली रिजल्ट ओहिना घोषित काएल जैत छैक. किछु विशेष तरह’क जनता’क ओहि मे इन्वेस्टमेन्ट रहैत छैक आ एहि कम्पनी’क पर्फ़ोरमेन्स’क आधार पर आतँकवादी रुपी कम्पनी’क शेयर’क मूल्य घटैत बढैत रहैत छैक आ ओहिना आतँकवाद’क पैसा बी.एस.ई. आ डाउ जोन्स मे लागल रहैत छैक.”
एक सँग एतेक बात हमरा बुझि मे नहि आएल. हम कहलिअनि, “अहाँक एतेक बात हमरा अपच लागि रहल अछि”
ओ तपाक सँ उत्तर देलैथ, “साधारण बात अछि. आई काल्हुक नवयुवक जखन कोनो कम्पनी मे भर्ती होएत छैक तऽ की देखैत छथि. कम्पनीक की पर्फ़ोरमेन्स छै? यदि तीन साल काज काएल जाए तऽ प्रोफ़ाइल मे की बढ़ोतरी हेतैक, दरमाहा कतेक भेटतैक आ पर्क कतेक भेटतैक”
हम चुप छलहुँ आ ओ अपन तरँग मे छलीह, “ओसामा के कोरपेरेट मे भर्ती होबए सँ पहिने अफगानी, पाकिस्तानी आकि पस्तुनी यूवक यैह देखैत छथि जे हुनकर कैरियर कतय नीक रहतैक, अलकायदा मे, तालीबान मे, या जैशे मुहम्मद मे. जे अमुक यूवक केँ नीक दरमाहा आ पर्क दैत छैक ओतैये जाइत छैक.”
“आ फेर ओ लोकनि नौकरी कोना चेन्ज करैत छैक” हम चुटकी लैत पुछलिअनि.
हमर चुटकी पर ओ एना प्रतिक्रिया देलथिन जे मानू हमरा हुनकर बात बुझबाक योग्यते नहि अछि.
मुदा जवाब तऽ हुनका देनाइए छलनि, ओ कहय लागलीह, “कम्पनी मे जेना लोक नौकरी चेन्ज करैत छैक, ओसामा के लड़ाका तहिना नौकरी चेन्ज करैत छैक. जे बेसी दरमाहा देत ओतय चलि जायत. दोसर बात कम्पनी’क ब्रैन्ड मूल्य ओहि मे बहुत महत्वपूर्ण स्थान राखैत छैक. अतः यदि कोनो यूवक जैशे-मोहम्मद छोड़ि कम पैसा मे अलकायदा ज्वाइन कऽ लैथ तऽ कोनो अनर्गल नहि. ओना प्रत्येक कम्पनीक भाँति आतँकवादी सँगठन सेहो चाहैत छैक जे हुनकर कम्पनी मे सबसँ बेसी प्रतिभाशाली यूवक होबए जाहि सँ सँगठन दिन दूना आ राति चौगूना बढ़ए”.
आब हुनकर बात किछु तर्कसँगत लागि रहल छल, हम कहलिअन्हि, “से तऽ ठीक छै, मुदा ई बताउ जे प्रत्येक कार्पोरेशन के लक्ष्य होइत छै जे बेसी सँ बेसी पैसा कमाएल जाए. ओसामा के लक्ष्य तऽ एहेन नहि छल.”
“से अहाँ के के कहलक. आतँकवादी सँगठनक लक्ष्य मात्र पैसा होएत छैक. पैसा’क अलावा आओर किछु नहि” अहाँक काकी जोर दैत कहलथिन्ह.
हम हुनकर गप्प सँ सँतुष्ट नहि छलहुँ. “पैसा तऽ दोसरो तरीका सँ कमाएल जा सकैत छैक, एहेन रास्ता ओ लोकनि किएक चुनए छै”
हमरा तुरन्ते उत्तर भेट गेल, “आओर नहि तऽ की? अफ़गानिस्तान के आठवाँ पास नवयूवक केँ सोफ़्टवेयर कम्पनी मे नौकरी भेटतैक.”
“आ ओ जेहाद फेहाद...” हम पुछलिअनि.
“मात्र एकटा देखाबा. पैसा कमेनाई मुख्ये टा नहि अपितु मात्र एकेटा लक्ष्य. जे आतँकवादी सँगठन जतेक बड़का घटना के अँजाम दैत छैक ओकर मारकेट वैल्यू ओतबी बढ़ैत छैक. इहो एकटा सर्विस इन्डस्ट्री थीक जतय आदमी के मूल्य कोनो आओर चीज सँ बेसी होएत छैक”, काकी अपन जवाब सँ हाजिर छलीह.
आब हमरा लागय लागल छल जे काकी’क बात मे किछु दम जरुर छैक. हम कहलिअनि, “जँ अहाँक बात सत्य थीक, तऽ लागले हाथ इहो बता दिअ, जे आब आतँकवादी सँगठन के की हेतैक. ओसामा बिन लादेन तऽ मरि गेलैक.”
हम देखलहुँ जे काकी’क मुँह मे बुरलेल शब्द आबैत आबैत रुकि गेलनि. पत्नीधर्म इन्टरनेट सँ जोगाएल जानकारी पर बेसी भारी पड़ि रहल छलनि. ओ शालीनता सँ उत्तर देलथिन, “ओसामाक मरने किछु नहि होएत. जेना कोनो पैघ कम्पनी’क सी.ई.ओ. “रिटायर हर्ट” भऽ गेलाह. कम्पनी’क परफोर्मेन्स किछु दिन’क लेल डाँवाडोल रहत. फेर सँ वैह. कोनो दोसर लोक एहि पद केँ ग्रहण करताह आ कम्पनी केँ उपर लऽ जेबाक लेल प्रयत्न करताह”.
मोन होएत छल जे इन्टरनेट हमर जवानी मे किएक नहि आएल. अहाँ लोकनिक काकी’क बुद्धि चालीस साल पहिने खुजि जाइते. काकी’क सँ हम हारि मानि गेल छलहुँ आ हुनकर तर्क पर हम स्तब्ध भऽ चुपचाप बैसल छलहुँ. स्त्रीगण अपन पति केँ हारि मानैत नहि देखि सकैत छथि. हमरा सान्त्वना दैत कहलैथ, “ओसामा’क मरला’क बाद एखन आतँकवाद रुपी कार्पोरेट मे मन्दी अछि.”
काकी उपसँहार मे एकटा छोट सन लेक्चर दऽ देलीह, “आतँकवाद एकटा सर्विस इन्डस्ट्री थीक जाहि मे मुख्य उद्देश्य अछि पैसा लऽ केँ दोसरा लेल किछु काज करब थीक. एहि मे आउटसोर्सिँग सेहो होएत छैक. अमेरिका अरब जगत मे कब्जा केवल तेल’क पोलिटिक्स लेल केने छल. आ अरब जगत’क व्यापारी ओसामा सन लोक केँ फण्डिँग कऽ तेल’क सत्ता अपने हाथ मे राखए चाहैत छथि. ई सब पैसाक लेल खीचातानी होइत अछि. आ तथाकथित आतँकवादी एकटा स्किल्ड सोफ्टवेयर वर्कर सँ बढ़ि के किछु नहि”.
जखन हुनकर लेक्चर खत्म भेल तऽ हम जोर सँ श्वाँस छोड़लहुँ. ओसामा मरि चुकल छल. अहाँक काकी एहि स्थिति केँ आतँक’क मन्दी कहि रहल छलीह. आ एतय किछु दिन सँ हम अखबार मे पढ़ि रहल छलहुँ. भारत मे एकटा फेर सँ रीसेशन आबि रहल छल. काकी मँदी पर अपन वक्तव्य दऽ रहल छलीह. डर भेल कहीँ रिसेशन पर जँ हुनकर बहस शुरु भऽ जान्हि तऽ हुनका रोकब कठिन.
हलाँकि दू टा प्रश्न एखनहुँ मस्तिष्क मे बिर्र्रोह उठेने छल—जे खट्टर काका आ ओसामा बिन लादेन मे समानता की? आ दोसर जे आतँकवादक रिसेशन मे जन सामान्य पर की असर होएत छैक. अपने लोकनिक काकी अपन उफ़ान पर छलीह. हम चुप्पे रहबा मे अपन फायदा देखलहुँ. बाद मे अवसर भेटला पर एहि दू टा विषय केँ फेर सँ खोदब.

अरिकन्चन

2011-07-24T16:14:00.005+05:30

- अमित अभिनन्दन

घोघ तर सँ
तकैत दू टा
पैघ पैघ आँखि
पिन्डश्याम वर्ण पर
खूब तराशि क राखल
ओ कटगर नाक
खूब भरिगर खोपा

कवि- अमित अभिनन्दन,

झंझारपुर प्रखण्डक बलियारि ग्रामक निवासी 24 वर्षीय अमितजी पेशा सँ चिकित्सा विज्ञानक छात्र छथि आ संगे-संग साहित्यानुरागी सेहो। सम्प्रति ज. ला. नेहरु चिकित्सा महाविद्यालय, भागलपुर मे अध्ययनरत। एहि मन्च पर प्रकाशित हुनक इ दोसर रचना छियन्हि। हुनक पहिल रचनाक लेल एतय क्लिक करु।
सम्पर्क- +91-93865 50687

- सम्पादक, "कतेक रास बात"

आ खूब पातर ठोर
गरदनि पर
कने नीचा दबा के छलन्हि
कारी सियाह तिल
जेहने साफ व्यक्तित्व
तेहने सुन्दर दिल

मिथिला केर माटि मे पलल बढल
छलथि सर्वगुण सम्पन्न
मुदा सासुर मे रहि गेलन्हि सेहन्ता
जे खाइतथि भरि पेट अन्न

मोन नहि अछि
कहियो सुनने होयब
हुनक मुँह सँ
किछु अनुचित बात
रक्तरन्जित पीठ रहितो
गाल कहियो नहि सहलन्हि
नोरक आघात

हमर हुनक सम्बन्ध यैह
जे
हुनक हाथक
अरिकन्चन मे
हमरा भेटए किछु विशेष सुआद
से गाम गेला पर
किछु अशौकर्य रहितो
हुनक आवेश मे डूबल
हुनका करबे करियन्हि याद

ई हुनक आवेशे छलन्हि
जे सब गप बुझितो
हमर पएर
स्वतः हुनक आन्गन दिस
बढि जाएत छल
थारि पर बैसल
हमर जान्घ
अनगिनत बेर भराएल होयत
मुदा
बीअनि होंकति हुनक हाथ
कहियो नहि थकलन्हि

अन्तिम बेर भेटल रहथि
त कहलन्हि
बौआ
घर मे आयल छैक
दू टीन मटिया तेल
आत्मा सिहरि गेल
मुदा किछु बाजल नहि भेल
आगाँ ओहो नहि बजलथि
अपन नोरे सँ जेना
सब गप कहलथि

पहिल बेर देखलियैक
हुनक आँखि मे नोर
मृत्युक भय सँ कम्पित
पोर पोर

डूबैत के तिनकाक सहारा
भेटय वा नहि भेटय किनारा

नहि गेलियैक हम
हुनक अन्तिम यात्रा मे
कोन मुँह सँ जैतियैक
जकरा ओ बुझलन्हि
सहारा केर लाठी
ओ कोना के दैतय
हुनका काठी
जकरा ओ कएलन्हि
सभ सs बेसि सिनेह
उएह तोडलकय
हुनकर नेह

दू बरख बीत गेल
सुनलहुँ जे
हुनक प्राणनाथ
फेर पहिरलन्हि
ललका पाग
फेर जगलय
कोनो मिथिलाक
बेटीक भाग
फ़ेर अओतन्हि
कतेक रास दहेज
फेर फटतय
ककरो करेज

अस्तु
कोन काज हमरा एहि सभ स
किएक लगबियन्हि लान्छन
जाएत छी फ़ेर उएह अन्गना
खाएब नबकनियाक हाथक
अरिकन्चन ।

विवाह’क तेसर सप्ताह (कहानी)

2011-07-13T14:23:00.010+05:30

लेखक- आदि यायावर

(मूल नाम- डा. पद्मनाभ मिश्र)

[1]

राति भरि कछ-मछ करैत उर्मिला’क मोन उबिया गेल छलैन. आधा राति'क बादे हुनकर पति बेडरूम में आएल छलाह। एखन ओ एना फोंफ काटि रहल छलाह मानु जे बेटी’क विवाह एखने खतम भेल होन्हि। नौकर चाकर सब सुतल छल. आ बगल वाला फुलवारी मे झिंगूर किलोल करैत छल। चारु दिस आततायी सन्नाटा पसरल छल. हठाते बगल वाला आम गाछी पर टिह-टिहहिया आपन चिर परिचित आवाज देलक। ओहो आवाज कोनो टहँकार सँ कम नहि, सन्नाटा कें चीरैत ओ आवाज हुनकर हृदय कें बेधि देलकनि। एकर संगे टिह-टिहिया इहों सूचना देलकनि जे आब तेसरो पहर बीति गेल अछि। एक बेर ओ फेर सँ अपन पतिक मुंह देखे लागलीह. की सुन्दर दैदिव्यमान मुखमंडल छल, मानु, जेना कोनो गन्धर्व एखने पृथ्वी पर उतरल हो. एहेन सुन्दर छवि जे मात्र साहित्य में पढबा में भेटैत छैक. दैदिव्यमान मुँहे टा किएक, पछिला तीन सप्ताह'क घटना क्रम में हुनका ज्ञात भेलनि जे जतबी ओ देखबा में सुन्दर छलाह ओतबी हुनकर व्यक्तित्व सेहो नीक छनि. हुनकर पिता'क यश पुरे समाज में पसरल छलनि. विवाह सँ कतेक साल पहिने सँ एहि परिवार'क बारे में ओ सुनि चुकल छलीह. ओ लोकनि जतबी धनीक छलैथ ओतबी संस्कारी सेहो. हुनकर पति अपन पुरखा'क अर्जित धन संपत्ति में कोनो रूचि नहीं देखाबैत छलाह. ओ कहैत छलाह जे आदमी कें अपन दुनिया अपने बसेना चाही. विवाहोपराँत ई सब जानि उर्मिला कें बहुत खुशी भेल छलनि. आजुक समय में अरेंज्ड मैरेज'क बाद सब किछु एतेक बढियाँ भेटब हुनका पूर्व जन्म'क कोनो नीक काज बुझाना गेलनि. अपना आप कें ओ भाग्यशाली बुझए लागल छलीह.

मुदा पहिल सप्ताह के बादे एत्तेक किछु भऽ गेल जकर हुनका कोनो आशा नहि छलैन. आब तीने सप्ताह में सब किछु एतेक बदैल जेतैन तकरो हुनका कोनो अंदेशा नहि छलैन. विवाह'क उपरांत प्रत्येक स्त्री'क लेल सासूर एक रहस्य सँ कम नहि होएत छैक. पहिने तँ कोशिश केलथिन अडजस्ट करबाक लेल मुदा आब हुनका लागए लागलैन जे हुनकर कोनो दोष नहि. आब हुनका होइत छलैन जे हुनकर सासूर'क लोक बिलकूल अलग तरहक छैथ. विवाह'क मात्र तीन सप्ताह'क अंतराल में जतय एतेक नाटक भेल हो, ओहि बात कें ओ सामान्य कोना मानि सकैत छलीह. जखन हुनकर अपन पतिदेवे उपेक्षा करए छथि तऽ दोसरा'क कोन गप्प. पछिला तीन सप्ताह में कोनो दिन एहेन नहिं भेल छल जखन हुनकर पति एको घंटा'क लेल आबि कें हुनका सँ प्रेम सँ बात केने होइथ. हुनकर उम्र'क स्त्री लोकनि की-की सपना देखैत छथि. ओ त’ एतेक अनुशाषित जीवन जीबाक पक्ष में छलीह. लेकिन तीन सप्ताह में आब हुनका विश्वाश होमए लागलैन जे हुनकर उपेक्षा भ' रहल छन्हि. जखन हुनकर पतिए के अपन कारोबार आ पारिवारिक समस्या सँ निकलबाक लेल समय नहि छलैन तखन बेकारे विवाह केलैथ. उपेक्षा सँ विद्रोह'क भावना उत्पन्न होइत छैक, हुनका सेहो भेलैन. मुदा द्विरागमन'क समय में अपन पिता'क देल गेल वचन याद आबए लागलैन. एक प्रतिष्ठित परिवार में जन्म लेला'क बाद आ एक तथाकथित प्रतिष्ठित परिवार में विवाह भेला'क बाद विद्रोह करब हुनका ओप्शने मे नहि रहैन. ओनाहींए हुनकर सासु'क अनसन सँ सब किओ परेशान छल. हिनकर कोनो भी एक गलत स्टेप नैहरा'क प्रतिष्ठा कें हानि पहुंचा सकैत छल.

एक रहस्यमयी सासूर'क वातावरण में हुनकर कुंठित भावना अवसाद में बदलल जा रहल छल. एक बेर फेर सँ अपन पति'क दैदीप्यमान मुखमंडल के देखबाक कोशिश करए लागलीह. एहि बेर हुनका तामस नहि उठलैन. अपितु हुनका अपन पति'क ऊपर में दया आबए लागलैन. आजुक समय में, के एहेन आदमी होएत छैक जे अपन नव विवाहिता पत्नी कें छोडि अपन जेठ भाए'क कारोबार में हाथ बंटेबाक लेल गाम सँ दूर चलि जैत छैक? हुनका लग में त’ इहो ऑप्शन नहि छलनि जे ओ कहि सकैत छलीह जे हुनकर पति जे करय जा रहल छैथ, ओ मात्र बेवकूफी’क अलावा अओर किछु नहि थीक. स्त्री एक मजबूरी'क नाम सेहो थीक. कतेक दिन सँ अपन भावना कें दबा के रखने छलीह। आब मोन करैत छलैन जे ठोहि पाडि कें कानैथ. मुदा डर इहो छलैन जे पतिदेव कहीं उठि नहि जैथ आ हुनकर एखन धरि'क त्याग कहीं स्वार्थ में नहि बदली जैन्ह।

ओ उठि के बैसि गेलीह. सिरहौने मे ठेहुन मोड़ि कें अपन नाक आ मुह कें दुनू ठेहुन मे नुकौने रहलीह। किछु देर बाद नहुए नहुए केहुनी’क नीचा मे गेडुआ आएलन्हि आ नहि जानि कखन नीन्न आबि गेलनि। जखन आँखि फुजलनि त देखलैथ जे पतिदेव एखन धरि सुतल छैथ. नित्य क्रिया सँ निपटि केँ फुलवारी मे राखल आरामकुर्सी पर ई सोचि बैस रहलीह जे जखन पतिदेव उठताह तऽ हुनका ताकैत ताकैत एतय जरूर एताह. आब ओ चुप नहि रहतीह. विद्रोह नहि तऽ तर्क तऽ काइए सकैत छलीह. कम सँ कम पुछबाक तऽ चाही जे घर मे जँ एत्तेक नाटक लेल पहिने सँ तैयारी रहैन तऽ एकटा शरीफ लोकनि बेटी सँ विवाहे किएक केलनि. एक हजार प्रश्न फुरैत छलैन. मुदा स्त्री’क मोन मर्यादा’क सीमा मे बान्हल छल. तेँ मोने मोन विचारए लगलीह जे कोन कोन प्रश्न पुछबाक छैन्ह, जाहि सँ मर्यादा’क सीमा’क उलँघन नहि होमए.

विवाह’क पहिल किछु सप्ताह मे नवविवाहिता की करैत छैथ? जेना प्रत्येक बच्चा देखबा मे क्यूट होएत छैक, जेना विवाह मण्डप पर बैसल कनियाँ सुन्दर होएत छैक. इहो बात ओतबी सत्य जे प्रत्येक नवकनियाँ के ई होएत छनि जे अमुक विवाह कए ओ धन्य भऽ गेलीह. ई अग्नि’क चहु दिस सात फेरा’क ई कमाले थीक जे नवकनियाँ के हुनकर पति पुरे दुनियाँ मे सब सँ नीक लोक लागए लागैत छन्हि. नवविवाहिता के निगेटिव बात नहि फुरए छनि आ फुरबाको नहि चाही. प्रत्येक सामान्य विवाह मे कनियाँ के होएत छनि जे हुनका सपना’क राजकुमार भेटल छनि.

उर्मिला फुलवारी मे राखल लकड़ी’क आराम कुर्सी मे धँसल यैह सोच मे छलीह. अपन काल्पनिक दुनियाँ मे ओ अपन राजकुमार केँ परीकथा सदृश्य उज्जर उज्जर घोड़ा पर दूर सँ आबैत देखैत छलीह. मुदा यथार्थ हुनका झमान भऽ पटैक दैत छलनि. लोक सपना सँ तखने आन्दित भऽ सकैत छैक जखन ओहि मे किछु वास्तविकता होइछ. अन्यथा एहेन सपना लोक केँ डरा जैत छैक. उर्मिला अपन कल्पना सँ नहि डेराइत छलीह. बल्कि हुनका अपन भाग्य पर आब शक होमए लागलनि.

[2]

ओ कोन अनर्गल अपेक्षा करैत छैथ. हुनका अपन पतिक सामीप्य चाही, से की गलत? एखन धरि ओ अपन पति सँ सहज नहि भेल छलीह. विवाह’क तीने सप्ताह मे कोनो लड़की सहज कोना भऽ सकैत छैक. किछु समय तऽ चाही एक दोसर केँ जानबाक लेल. हृदय’क एक कोन मे इहो आशँका छलैन जे पतिदेव’क कोनो मजबूरी छैन जे नहि तऽ ओ बुझि सकैत छलीह आ नहिएँ हुनकर पति हुनका बुझबे चाहैत छथि. सम्भावना अपार छल आ ओ प्रत्येक सँभावना केँ अपन कल्पनाशक्ति’क हिसाब सँ विश्लेषण करैत छलीह.

फेर कनखी आँखि सँ पाछु देखलैथ. पतिदेव बेडरुम’क खिड़की सँ चहलकदमी करैत देखा पड़ैत छलैन. जल्दी सँ मोने मोन प्रश्न’क लिस्ट फेर सँ बनबे लगलीह. पहिल प्रश्न जे हुनका अपन तथाकथित कारोबारी ट्रिप मे लऽ जेबा सँ किएक हिचकिचा रहल छैथ. दोसर प्रश्न जे कोन एहेन कारण छैक जे ओ हिनका महत्व नहि दैत छथि. आ अन्तिम प्रश्न जे एना कतेक दिन चलत. प्रत्येक प्रश्न तर्कसँगत छल, उचित छल आ समयानुकूल.

एक बेर बेडरुम केँ फेर सँ देखलैथ. आब पतिदेव फुलवारी दिस आबि रहल छलाह. जल्दी सँ अपन ध्यान चिड़ै चुनमुनी दिस दऽ देलथिन. हृदय मे पसरल अन्तर्द्वन्द्व केँ अपन भीतरे रोकबाक लेल भरिसक प्रयास करय लागलीह. हुनका आभाष भऽ गेलनि जे ओ आब बिल्कूल लऽग आबि गेलाह. आगू मे अनन्त आकाश पसरल छल आ ओहि मे सूर्य’क लाल-लाल रौशनी हुनकर अवसादित मोन केँ तत्क्षण उर्जा सँ भरि रहल छल. लाल लाल आकाश’क नीचा मे शरद ऋतु’क हरीहरी पसरल छल. आ क्षितिज पर बहुते ऊँच आकाश मे नम्हर लोल वाला चिड़ै’क झुण्ड जीवन यापन लेल उड़ि क’ कतओ जा रहल छल.

जतय एक दिस प्राकृतिक सुन्दरता’क मनोरम दृश्य छल, ओतैये दोसर दिस असहजता, अकुलाहट, आ व्यथित मोन. ई बुझियो केँ जे, हुनकर पति पाछु मे ठाढ़ छथि ओ अनठा देने छलीह. ओ ई साबित करए चाहैत छलीह जे हुनको उपर मे कोनो विशेष फर्क नहि पड़ैत छैन. दुनियाँ ककरो बिना नहि रुकलै य’. आ सफल दाम्पत्य जीवन दुनू लोकनि’क बिना सम्भव नहि. पछिला तीन सप्ताह सँ ओ कोओपरेट करैत एलीह, आइ नै काल्हि एकर अन्त हेबे करतैक. मुदा एक कोन मे पति’क प्रेम’क लेल मोन तरसैत छलनि. हुनका मोन करैत छलनि जे पति पाछु सँ भरि पाँज मे पकैरि लैनि. ओ माफ कऽ देतीह. हिनकर छिरियैल मोन केँ अपन बाँहि मे समेटि केँ पति हिनका तृप्त कऽ सकैत छैन.
ओ फेर सँ डरा गेलीह. पछिला तीन सप्ताह सँ भेल नाटक हिनका फेर याद आबए लागलैन. फेर सँ वैह अन्तर्द्वन्द्व आ लोहार’क धौंकनी सदृश्य गति मे हृदय.

पाछु सँ पतिदेवक आवाज सुना’ पड़लैन, “उर्मिला !”.

ओ चौँकि जेबाक सफल प्रयास केलैथ आ मुड़ी घुमा केँ पाछु देखलैथ. पतिदेव मुस्की मारैत ठाढ़ छलाह. हिनका एना बुझना गेलैन जे एत्ते किछु भऽ गेलाक बाद किओ एत्तेक सहज कोना भऽ सकैत छैक. दू टा मे एकटा बात जरूर छैक, चाहे तऽ ओ “एक नम्बर” के नाटकबाज छैथ वा दुनियाँ’क सबसँ महान व्यक्ति. एहि दुनू मे कोन बात सत्य छल से जानबा मे ओ असमर्थ्य छलीह. उर्मिला ओतबी सहज रुपेँ उत्तर देलथिन, “जी? कहु!”.

“लागैत अछि अहाँ एखन धरि तमसाएल छी”, पतिदेव अपन बात कहलैन.

“नहि, अहाँ हमरा अन्यथा लऽ रहल छी”, पति’क सामिजिक आ व्यवसायिक दायित्व’क पूर्ति मे तन आ मन सँ सहयोग देनाय हमर कर्तव्य थीक. हम सैह निभा रहल छी.” उर्मिला’क शब्द मे रुष्ठता व्याप्त छल.
पतिदेव आराम कुर्सी’क पाछुए सँ हिनका भरि पाँजि मे पकरि लेलकनि. हिनकर दुनू हाथ हुनकर हाथ मे छल आ बिना शेव काएल दाढ़ी हुनकर कन्हा पर. पतिदेव’क बिना थकरल केश गाल मे गुदगुदी लगबैत छलैन. आ ओहि मे सँ एकटा लऽट आँखि मे जाकेँ तँग करैत छलैन. ओ अपन हाथ केँ छोड़ेबाक प्रयास करए लागलीह. मुदा मोने मोन हुनका नीक लागैत छलैन. मोन होएत छलैन जे ओ एहिना पकड़ने रहैथ. कखनहुँ कखनहुँ प्रेम केवल शरीरेटा’क भाषा बुझैत छैक. आ ओहि मे कोनो गलत बात नहि. हुनकर गर्म श्वाँस हिनकर कान मे घुसि आत्मा केँ तृप्त करैत छलैन. सृष्टि, सृजन, आ मानवीय भावना मे एक अजीब खेल भऽ रहल छल. उर्मिला केवल एक पात्र छलीह. मानवीय भावना खेल मे आगू निकलि गेल छल ओ अपन हाथ छोड़ेबाक लेल प्रयास केँ बढ़ा देलथिन.

जखन पतिदेव केँ लागलैन जे आब ओ हाथ छोड़ा लेतीह तऽ ओ हुनका कान मे कहलथिन्ह, “उर्मिला! अहाँ बहुत सुन्दर छी.”
उर्मिला अपन हाथ छोड़ा नेने छलीह. पतिदेव’क अन्तिम वाक्य सुनि हुनका आँखि मे नोर चलि एलनि. मुदा दोसरे क्षण पति’क केश के आपन आँखि लऽग सँ हँटा के एहेन प्रदर्शित केलीह जे मानू नोर पति’क बात सँ नहि, मुदा आँखि मे घोसिआएल केश सँ आएल अछि. पतिदेवो बुझैत छलाह जे नोर हुनकर केश सँ नहि आएल छल, अपितु हुनकर बात सँ आएल छल. प्रत्येक स्त्री’क मोन होएत छनि जे पति सुन्दरता’क वर्णन करैथ. मुदा आई विवाह’क तीन सप्ताह मे ओ पहिल बेर सुनि रहल छलीह. मात्र एकटा वाक्य! ओना त’ भावना केँ झकझोरि केँ राखि देलनि मुदा, ओ केवल गर्म तवा पर किछु बुनि पानि सँ बेसी नहि छल जे तीन सप्ताह’क उपेक्षा सँ लोहा सन गर्म हृदय पर छन्न सँ उड़ि गेलन्हि. गर्म तवा के सामान्य करवा लेल पानि’क किछु बुनि नहिँ अपितु लोटा’क लोटा पानि ढ़ाड़बाक जरुरत छल. पतिदेव एहि बात केँ बुझि चुकल छलाह, ओ कान मे फेर सँ कहलकनि, “एतय किओ आबि सकैत अछि. चलु ने अहाँ सँ बहुत बात केनाय अछि. चलु अपन रुम चलल जाए.”
उर्मिला चुप रहलीह. अपन बाडी लैन्गूएज सँ एखन धरि जतबैत छलीह जे हुनका आब पतिदेव’क बात कोनो विश्वास नहि छनि. बाडी लैन्गूएज मे इहो समाहित छलैन जे ओ केवल अपन पत्नि धर्म निभा रहल छलीह. पतिदेव हाथ खीचि बेडरुम मे लऽ जाएत छलैन आ ई चुपचाप चलि जा रहल छलीह. केवल विरोध मे अपन डेग’क गति कम केने छलीह.

[3]

बेडरूम पहुँचि पतिदेव धड़ाम दऽ केवाड़ बन्द कऽ देलकन्हि आ लऽग मे आबि हिनकर दुनू बाँहि के पकड़ि सीधे-सीधे आँखि मे देखैत बजलाह, “उर्मिला! अहाँ सचमुचे बहुत सुन्दर छी. अहाँक ललाट, आँखि आ ठोर भगवान बहुत फुरसत मे बनौने छथि. हम अहाँ के अपन जीवन-साथी पाबि धन्य भऽ गेलहुँ.”
एतेक बात कहि पतिदेव चुप भऽ गेलाह. प्रेमालाप आ लेक्चर मे अन्तर होएत छैक. प्रेमालाप ताली जेकाँ एक हाथ सँ नहि मुदा दुनू हाथ सँ बजैत छैक. हुनका प्रतिउत्तर मे किछु सुनबाक छलैन. उर्मिला अपन भावना केँ अपन पुरा काबु मे केने रहलीह. ओ मूर्तिवत ठाढ़ छलीह. पतिदेव के भऽ रहल छलैन जे आब गड़बड़ भऽ रहल छैक. हुनकर मजबूरी हुनकर प्रयास मे साफ प्रदर्षित भऽ रहल छलनि. हुनका मुँह सँ एक्के टा वाक्य निकललनि, “उर्मिला हम अहाँ सँ बहुत प्रेम करैत छी”.

ई कोनो साधारण वाक्य नहि छल. पछिला तीन सप्ताह मे नव सासूर मे भेल अप्रत्याशित नाटक’क बाद बहराएल एहेन वाक्य छल जकरा सुनबाक लेल मोन तरैस गेल रहैन. पतिक प्रेमालाप मे हुनकर मजबूरी सद्यः देखा पड़ि रहल छलैन जे हुनकर व्याकुलता केँ बढ़ा रहल छलैन. किछु देर दुनू व्यक्ति चुप चाप रहल. पतिदेव फेर सँ कहलकनि, “उर्मिला हम सचमुचे अहाँ सँ बहुत प्रेम करैत छी, अहाँक चुप्पी हमर हृदय केँ बेधि रहल अछि.”

उर्मिला किछु नहि बजलीह. पति’क मजबूरी केँ यथोचित सत्कार देनाए अपन पत्नी धर्म बुझलथिन. मुदा ओ चुप रहलीह. जखन भावना’क ज्वार हृदय सँ निकलि आँखि मे एलनि तऽ आँखि सँ नोर निर्बाधित रुप सँ बहए लागलनि आ पतिदेव हुनकर बामा हाथ सँ बाँहि पकड़ने दाहिना हाथ सँ नोर पोछऽ लागलनि तऽ हिनका सँ नहि रहल गेलनि. हुनकर छाती मे मुँह नुकाए हिचुकि हिचुकि केँ कानए लागलीह. हिचुकी’क बीचे मे उर्मिलोक मुँह सँ निकलए लागलैन, “हमहुँ अहाँ सँ बहुत प्रेम करैत छी. ई हमर पूर्व जन्म’क कृति अछि जे अहाँ सन पति भेटल अछि.”

पति दुनू गाल केँ अपन हाथ मे लऽ अपना दिस खीचि लेलकनि, एक बेर नोर सँ भरल लाल लाल आँखि मे देखि कहए लागलनि, “अहाँ’क आज्ञा बिना हम नहि जा सकैत छी. जाबए धरि अहाँ हँसी खुशी नहि विदा करब हमरा कोनो काज मे मोन नहि लागत. हमर यात्रा सफल नहि होयत”.

“हमर कोन गलती? हम कोनो बहुत पैघ डीमान्ड कऽ रहल छी? हमरा तऽ केवल अहाँक सामीप्य चाही. हम तऽ सिर्फ अहाँक सँग रहए चाहैत छी”, उर्मिला बिना साँस लेने एक्के दम मे सब बात कहि गेलीह.
पतिदेव जवाब देलथिन्ह, “हम फेर सँ वैह आर्गुमेन्ट देब. अहाँ अपन पिता’क घर मे सुख समृद्धि मे जीवन बीतेने छी. अहाँक कोमल शरीर आ कोमल हृदय दुनियाँक यथार्थ सँ भेँट नहि केने अछि. एक पति भेलाक कारणेँ हम कहि रहल छी जे अहाँ जुनि जाऊ. जीवन बहुत पैघ छैक आ ई समय बहुत कम. बुझियो जे हम गेलहुँ आ खट दऽ आबि गेलहुँ”.

उर्मिला’क उमड़ल भावना फेर सँ निराशा मे बदैल रहल छल. हुनका होमए लागलैन जे पतिदेव जिद्दी किस्म के इन्सान छथि. ओहो तर्क सँ अपन बात कहबाक प्रयास करए लागलनि, “भऽ सकैत अछि जे शरीर सँ हम कोमल छी आ आई धरि कोनो विशेष टेन्शन नहि झेललहुँ. मुदा मानसिक रुपेँ हम ओतबी मजगूत छी.”
पतिदेव कहलकनि, “उर्मिला! अहाँक भावना’क हम सम्मान करैत छी. मुदा हम अहाँ सँ बेसी दुनियाँ देखने छी. तेँ कहैत छी, अहाँ रुकि जाउ.”
उर्मिला जवाब देलथिन, “हम अहाँ’क बात सँ सहमत भऽ जैतहुँ. अहाँ’क पैघ भाए अहाँ माएक’क जिद्द’क लेल जाएत छथि तऽ जाथु. अहाँ छोट भऽ केँ हुनका मदद लेल जैत छी त जाउ. मुदा जहिना अहाँक भाउजी अहाँक भैया सँग लागल जैत छथि, ओहिना हमरो सँग नेने चलु.”

पतिदेव केँ उर्मिला’क एत्ते तर्क’क आशा नहि छलनि. ई बात सत्य छल जे हुनकर भाउज हुनका लोकनिक सँग जा रहल छलीह. हुनके लोकनिक सँग उर्मिला से चलि जेतीह तऽ एहि मे कोन हर्ज.

ओ आब दोसर तर्क देबए लागलाह, “उर्मिला अहाँ एखन हमरा घर मे एकटा नवकनियाँ छी. अहाँ सँ हमरा माए बाबूजी’क बहुत लालसा छन्हि. हुनकर कुटुम्ब आ समाज हुनका सँ पुछतन्हि जे पुतोहु विवाह’क तीने सप्ताह बाद कतय गेलथिन्ह, तऽ हुनका कोनो जवाब नहि भेटतन्हि. हमर माए बाबुजी हमरा लेल भगवान सँ कम नहि छथि. हम हुनका लोकनि केँ मजबूर नहि देखए चाहैत छिअन्हि”.

उर्मिला केँ मोन मे भेलनि जे कहि दैथ. हँ! एहने माए जे बेटा’क विवाहोपरान्त एत्तेक नाटक केने होइन्हि आ एहेन पिताजी जे हिनकर माता’क अनर्गल माँग पर मजबूर भऽ चुप्प छथि. मुदा हुनकर अपन शिक्षा आ सँस्कार हुनका चुप्प रहबाक लेल प्रेरित करैत रहलनि. ओ चुप्प रहलीह. जखन हिनका मुँह सँ किछु नहि निकललन्हि तऽ पतिदेव फेर सँ कहए लागलन्हि, “देखु उर्मिला! अहाँ हमरा सँ प्रेम करैत छी की नहि?”

ओ कहलीह, “हँ! हम अहाँ सँ बहुत प्रेम करैत छी”.

“प्रेम देबाक नाम थीक. हम अहाँ केँ तर्क सँ नहि बुझा सकलहुँ. तेँ किछु माँगि रहल छी. बाजू अहाँ हमर माँग पूरा करब?” पतिदेव कहलकनि.
ओ फेर सँ चुप्प रहलीह. पतिदेव किछु काल प्रतीक्षा’क बाद मे फेर सँ कहए लागलाह, “उर्मिला! तऽ की अहाँ अपन पति केँ हारैत देखए चाहैत छी. अहाँ के ई नीक लागत? जे समाज हमरा कायर बुझए.”
पतिदेव सँगमरमर’क फर्श पर ठेहुन भरे बैसि गेलाह आ हाथ मे मुँह नुकाए नहुएँ नहुएँ अपने आप सँ कहए लागलाह, “उर्मिला! हम मजबूर छी. हमर सहायता करु”.

एहि बेर उर्मिला केँ अपन पति’क बात मे सत्यता आ इमानदारी देखा पड़लनि. हुनका उपर मे हिनका दया आबए लागलनि. अपना आप सँ घृणा होमए लागलनि. अपने आप के कहए लागलीह, “उर्मिला! अपन सासु जेकाँ अपन स्वार्थ केँ सबसँ आगू जुनि करु! ”. यदि कोनो भाजेँ ई बात हुनकर नैहर चलि जैन तऽ हुनकर माए बाबूजी’क प्रतिष्ठा केँ ठेस पहुँचतनि. आगू फर्श पर पति बैसल छलनि, निराश आ आ मजबूर.

पति’क बाँहि पकड़ि ओ उठा देलथिन आ कहय लागलीह, “हे लक्षमण, हम जनक पुत्री उर्मिला अहाँक एक पत्नी’क रुप मे अहाँ के अनुमति दैत छी जे अहाँ जाउ, आ अपन भैया-भाउजी के हुनकर धार्मिक कर्तव्य’क पालन करबा मे सहयोग करु. हम बारह बरस धरि अहाँ बाट ताकब. जाउ आ अहाँ जग जीत केँ आऊ”

किछु धरि पतिदेव अवाक छलाह. उर्मिला सेहो अवाक छलीह. जखन पतिदेव प्रशँशा आ धन्यवाद’क दृष्टि सँ देखए लागलन्हि तऽ हिनका रहए नहि गेलनि. बारह बरस छोट समय नहि होइत छैक. से सोचि, एक बेर फेर सँ हुनका आँखि सँ अश्रु धारा बहए लागलनि. पति चुनौती देलकनि, “अहाँ कहैत छी जे मानसिक रुप सँ बहुत मजगूत छी, आब अहाँ किएक कानि रहल छी.”

तुरन्ते नोर पोछि उर्मिला यथावत ठाढ़ रहलीह. पति हिनकर नोर पोछि कहलकनि, “एना नहिँ! अहाँ हँसि के हमरा विदा करु.” उर्मिला’क मुस्की निकलि गेलनि. किछुए देर मे यात्रा’क तैयारी होमए लागल. उर्मिला ओहि तैयारी मे व्यस्त छलीह, एहि बात सँ अनजान जे हुनकर त्याग केँ कोनो मोल नहि भेटतन्हि वा नहि. शायद भावना के दबाए अपन पत्निधर्म निभा रहल छलीह.
ओहि यात्रा’क सँग मानवता’क इतिहास सेहो आगू बढ़ल जा रहल छल. एकबेर फेर सँ, एकटा स्त्री, एकटा पुरुष केँ हरा देने छलीह. आ उर्मिला मानवे टा नहि मानवता केँ सदा’क लेल अपन ऋणी बना देने छलीह.

इतिहास सतर्क छल. अपन एकटा महत्वहीन पन्ना मे एहि घटना केँ सावधानी सँ नुका लेबाक योजना बना रहल छल.

किछु त हम करब

2011-06-11T21:19:00.013+05:30

किशन कारीगर

अवस्था भेल हमर आब बेसी
टुघैर टुघैर हम चलब
अहाँ आगू आगू हम पाछू पाछू मुदा
अपना माटि पानि लेल किछु त' हम करब

नूनू बौआ अहाँ आऊ
बुच्ची दाय अहूँ आऊ
दुनू गोटे मिली जल्दी सँ
मैथिली में किछु खिस्सा सुनाऊ

कवि- श्री किशन कारीगर

नान्ही टा मे बजलौहं एखनो बाजू

मातृभाषा मे बाजू अहाँ निधोख

कनि अहाँ बाजू कनेक हम बाजब

नहि बाजब त कोना बुझहत लोक

परदेश जायत मात्र किछु लोक

बिसैर जायत छैथ मातृभाषा कें

अहिं बिसैर जायब त आजुक नेना कोना बुझहत

केहन मीठगर सुआद होयत अछि मातृभाषा केँ

अप्पन माटि पानि अप्पन भाषा संस्कृति
पूर्वज के दए गेल एकटा अनमोल धरोहर

एही धरोहर के हम बचा के राखब

अपना माटी पानि लेल किछु त हम करब

कोना होयत अप्पन माटिक आर्थिक विकास
सभ मिली एकटा बैसार करू कनेक सोचू
सभहक अछि एकटा इ दायित्व
किछु बिचार हम कहब किछु त अहूँ कहू

हमरा अहाँक किछु कर्तब्य बनैत अछि
एही परम कर्तब्य सँ मुँह नहि मोडू
सिनेह राखू हृदय मे सभ के गला लगाऊ
अपना माटी पानि सँ लोक के जोडू

समाजक लोक अपने में फुटौवैल करैत छथि
मनसुख देशी त धनसुख परदेशी
एक्के समाज में रहि ऐना जुनि करू
एकजुट हेबाक प्रयास आओर बेसी करू

एक भए एक दोसरक दुःख दर्द बुझहब
अनको लेल किएक ने कतेको दुःख सहब
आई एकटा एहने समाजक निर्माण करब
जीबैत जिनगी किछु त हम करब

हाम्रो अछि एकटा सेहनता एक ठाम बैसी
सभ लोक अपन भाषा में बाजब
औरदा अछि आब कम मुदा जीबैत जिनगी
अपना माटी पानि लेल किछु त हम करब ।

स्वागत बसंत

2011-03-03T14:58:00.005+05:30

-- करण समस्तीपुरी